ملف إطلاق النار بتشييع ضحايا "عين سعادة" بيحشوش انتقل للملاحقة الجدية. القضاء العسكري أصدر بلاغات بحث وتحرّي بحق عناصر من "القوات اللبنانية"، وهالمرة القصة مش "قواص عشوائي".

المعطيات بتقول إنو اللي صار "فعل منظّم" من مجموعة مسلحة إلها قيادة واضحة. البلاغات شملت مسؤول المجموعة والعناصر اللي تحركوا بتنسيق كامل، وهيدا بيأكد فرضية "القرار المسبق" بالظهور المسلح.

المعلومات الأمنية بتكشف إنو المجموعة تابعة لمركز "برج حمود" بالقوات، وبقيادة عصام رومل بشارة. والأخطر، إنو هالعناصر بيمارسوا أدوار أمنية تنظيمية، وهون السؤال: وين بيبدأ وين بخلص قرار الحزب المركزي؟

ميدانياً، الحادثة عكست فلتان خطير؛ عناصر طلعوا علناً، قوصوا بين الناس، واختفوا. واليوم، المسار القضائي اصطدم بعقبة "عدم تسليم المطلوبين".. وهيدا حط الأجهزة الأمنية قدام اختبار حقيقي بعيداً عن السياسة.

بالمحصلة، التحدي صار واضح: هل الدولة قادرة تفرُض القانون على الكل، ولا السلاح الحزبي رح يبقى فوق العدالة؟