في حلقة جديدة من Bonjour Beirut على شاشة RedTV، استضفنا السيدة إيناس فخر الدين، رئيسة جمعية تمنا، والسيدة تانيا تابت، الرئيسة التنفيذية للجمعية، بمناسبة مرور 20 سنة من العطاء المستمر وخدمة الأطفال في لبنان.

خلال الحلقة، حكينا عن قصة تمنا وكيف قدرت، على مدى عشرين سنة، ترجع ترسم البسمة على وجوه آلاف الأطفال من خلال تحقيق أمنياتهم مهما كانت بسيطة أو كبيرة.

جمعية تمنا هي جمعية إنسانية بامتياز وما بتميّز لا بين دين ولا جنسية، وبتغطي كل المناطق اللبنانية بروح محبة، مسؤولية، وأمل. توقفنا أيضاً عند نشاطات الجمعية المستمرة، وكيف قدرت تحافظ على نفس الهمة وعلى نفس روح العطاء رغم كل الظروف الصعبة يلي مرّ فيها البلد.

ومن أبرز المبادرات اللي حكينا عنها خلال الحلقة كانت حملة Circle of Hope، يلي بتفتح الباب لكل شخص قادر يحب يشارك، لحتى يكون جزء من دائرة أمل حقيقية تساعد بتحقيق أمنية طفل بحاجة لدعم، لفرحة، ولحلم يتحقق.

ومع اقتراب فترة الأعياد، ذكّرونا ضيفاتنا إنو واجبنا نتذكّر الأطفال المحتاجين دايماً، مش بس بالأعياد…

لأن الأمل مسؤولية يومية، ولأن ابتسامة طفل قادرة تغيّر الدنيا.